قطار العمر .. شخصيات مندائيه / الدكتور عبد الهادي صالح

                                                                                                         

 

 
 

قطار العمر .. شخصيات مندائيه

 
أنقل لكم نص ما تفضل به العم توفيق بقال أطال الهيي قدماي في عمره من تعليق حول الشخصيات المندائيه .. رواه نهويلهم .. المذكوره في الصوره المنشوره سابقا ..... الدكتور عبدالهادي صالح .. لندن في ٢٤/٧/٢٠٠١١ 

 
أول واحد على اليمين عباس عماره مران :: عدهم محل صياغه فضه في بغداد وكان في المحل عباس عماره وأبوه عماره مران و بقال خنجر .. وكان عباس معروف عند الحكومه و ينقش نقش كلش زين .. وكتابته بالعربي كلش زينه .. وكلامه حلو ومعروف عند الحكومه في بغداد ... وبقى سنين في بغداد .. وصار في امريكا معرض وراح الى امريكا وعجبته .. بقى فيها يمكن عشرين سنه ولما رجع الى العراق أهله كانوا في العماره .. وراح الى العماره وبقى فيها كم شهر وتوفى في العماره .. وهو عنده بنت شاعره : لميعه عباس عماره .. وهسه هي في أمريكا ..
وأما الصوره المقابله الى عباس فهو والد عباس .. عماره مران .. فهو صائغ وخوش إنسان .. فهو ينكت ويضحك توفى في بغداد ..... 
وأما الذي على يمين عباس فهو رشيد ملا خضر أخو زهرون وخال عباس وهو نقاش كلش زين و يغني وصوته كلش حلو .. يغني أبو ذيه وبستات كلش حلوه وإنسان كلش طيب ما شفته فرد يوم حكى على واحد موزين وعلى طول يضحك وسوالفه حلو وانا تزوجت بنته الصغيره .. توفى في العماره .. وأما هرمز ملا خضر يصير يصير مقابل أخوه رشيد الذي جالس قدامه هذا عنده سوالف كلش حلوه نكعد يمه و يجيب النه سوالف كلها تضحك .. هذي قصه من سوالفه :: يكول سافرت من بغداد الى العماره اشوف اهلي .. زوجته اسمها سعيده .. قبل ماكو سيارات ..بالمركب ... بقيت بالعماره تقريبا شهر .. خلصته فلوسه .. لأن يشرب عرق يوميا أكثر من بطل .. كال راح أرجع الى بغداد .. ركب بالمركب الى بغداد ... المركب يوصل الى بغداد نهار وليله حتى يوصل ... أخذ وياه بطل عرق .. ركب بالمركب ... شرب الى أن خلص البطل ...والمركب يمشي صارت الساعه تقريب العشره بالليل ويريد يشرب .. ما كو عنده بعد وين يروح .. تالي يكول شفت المساعد مال مدير المركب كلتله بطني توجعني ماكو دوه عدكم .. صفن وكله عدنا .. جابله كلاص فيه عرق كله غمض عينك وشربه سريع فرد مره .. غمض عيونه وشربه .. كله ها اشلونك هسه .. كله خوش دوه شويه بطني أحسن .. بس اشوف المركب يركص .. المساعد كال راح اجيبله كلاص ثاني واضحك وياه حتى نخلص الليل   ... جابله بيك ثاني .. غمض عيونه و شربه ... المساعد كله هسه اشلونك ... كله اشوف المركب كله ذهب خالص اطوني منه وصله اشتغل بيها ... المساعد مات من الضحك .. كال اجيبله بيك ثالث بس اروح للمدير خلي يجي يضحك ويانه .. راح للمدير وكله .. جابله البيك الثالث مع المدير   .. المدير يعرف هرمز يشرب كثير .. لم شاف هرمز عرفه .. كل للمساعد انت تضحك بس هو كاعد يضحك عليك .. هذا لو يشرب القرابه كلها ما يسكر ... طفر عليه هرمز وكله منين الله جابك .... عاد المدير كل للمساعد اطيه بعد بيك وبس ...  
أما ثالث واحد لابس عكال أبيض هذا ذب العكال وصار افندي اسمه سكران وعلى طول اليوم يشرب ازيد من ابوه هرمز .. فهو لا يقرأ ولا يكتب بس يعرف يحجي انكليزي تمام .. صار معرض في فرنسا وراح وبقى مده هناك كام يحجي فرنسي كلش زين حتى من يسكر يكوم يغني فرنسي .. يعرف ثلث لغات وهو لا يقرأ ولا يكتب .. هو خوش رجال عل كولتهم .. جانتل مان .. وشاطر وتزوج حياة بنت عمه رشيد .. وصار عنده اولاد اثنين منعم و فرانس وبنات .. هو انسان طيب وماعنده اذيه على واحد ..
رشيد وهرمز خوان ملا خضر .
              توفيق بقال خنجر
              صحه وعافيه للجميع
اسوثا و زكوثا و هيلا و شرار و هدوه لبا لنفسكم وبدنكم جميعا
              الدكتور عبدالهادي صالح - لندن-

https://mail.google.com/mail/?ui=2&ik=e0de307be0&view=att&th=1315bea0d35f2c66&attid=0.1&disp=inline&zw